Dec 1, 2018

இருபத்து நான்கு லட்சம்

நவம்பர் 19 தொடங்கி 30 ஆம் தேதி வரை சுமார் இருபத்து நான்கு லட்சம் ரூபாய் கஜா நிவாரணத்திற்கென நன்கொடையாக வந்திருக்கிறது. அவற்றில் தார்பாலின் உள்ளிட்ட பொருட்களை நான்கேகால் லட்சத்திற்கு வாங்கியிருக்கிறோம். மீதமிருக்கும் தொகையானது மறு நிர்மாணப் பணிகளுக்குப் பயன்படுத்திக் கொள்ளப்படும்.

மறு நிர்மாணப் பணியாக என்ன செய்து தருவது என ஆலோசிக்கப்பட்டது. பள்ளிக்கூடம், அங்கன்வாடி ஆகியவற்றை சரி செய்து தரலாம் என்றெல்லாம் ஆலோசனை செய்த பிறகு எந்தவிதமான ஆதரவுமற்ற குடிசைவாசிகள் இழந்த குடிசைகளை மீண்டும் கட்டித் தரலாம் என்ற முடிவு செய்யப்பட்டது. பீட்டரும் அவரது குழுவினரும் ஒவ்வொரு பகுதியாக கள ஆய்வு செய்து பயனாளிகளை அடையாளம் கண்டறிந்து கொண்டிருக்கிறார்கள். இதுவரையிலும் சுமார் ஐம்பது பயனாளிகள் கண்டறியப்பட்டிருக்கிறார்கள். 




இனிமேல் கஜா நிவாரணப்பணிகளுக்கென நிசப்தம் அறக்கட்டளைக்கு பணம் அனுப்ப வேண்டாம். இருக்கும் நிதியை முழுமையாகப் பயன்படுத்த வேண்டும் என்தால் முதற்கட்டமாக இந்தத் தொகையை சரியான விதத்தில் பயன்படுத்தலாம். ஒருவேளை சில மாதங்களுக்குப் பிறகும் தேவையிருப்பின் அதற்கேற்ப அந்தத் தருணத்தில் முடிவு செய்து கொள்ளலாம்.  

நன்கொடையளித்த அனைவருக்கும் நன்றி. நன்கொடைக்கான ரசீது அனுப்பச் சொல்லி சிலர் கேட்டிருந்தார்கள். அப்பொழுது சாத்தியமாகவில்லை. மின்னஞ்சலைத் தேடியெடுத்து ரசீது அனுப்பி வைத்துவிடுகிறேன். ஒருவேளை யாரேனும் விடுபட்டுப் போயிருந்தால் வருத்தப்படாமல் ஒரு நினைவூட்டல் அனுப்பி வைக்கவும்.

vaamanikandan@gmail.com

பீட்டரும் சென்னை ட்ரெக்கிங் க்ளப்பும் தமிழகத்துக்குக் கிடைத்த வரம் என்றுதான் சொல்ல வேண்டும். எந்த விளம்பரமுமில்லாமல் வெறித்தனமாக அடுத்தவர்களுக்கு உழைக்கிறார்கள். பீட்டர் மென்பொருள் நிறுவனத்தில் பணியாற்றுகிறார். கிட்டத்தட்ட தமிழன் ஆகிவிட்டவர். அந்த நீல நிற டீஷர்ட்டும், அரைக்கால் ட்ரவுசரும் தவிர வேறு எந்த ஆடையிலும் அவரைப் பார்த்ததாக நினைவில் இல்லை. அவருடன் நேரம் காலம் பார்க்காமல் உழைக்க பரட்டைத் தலையும், தாடியுமாக சேறிலும் மண்ணிலும் எந்தச் சங்கோஜமுமில்லாமல் வேலை செய்யும் நூற்றுக் கணக்கான இளைஞர்கள். அடுத்த வேலை எங்கே சாப்பிடுவது, எங்கே தூங்குவது என்றெல்லாம் அலட்டிக் கொள்ளாத மனிதர்கள். அவர்களைப் பற்றி எவ்வளவோ எழுதலாம். என்ன எழுதினாலும் லட்சியமே செய்யாமல் அடுத்த வேலையைப் பார்க்கப் போய்விடுவார்கள். 

வரவு செலவில் ஏதேனும் சந்தேகமிருப்பின் மின்னஞ்சலில் தொடர்பு கொள்ளவும். பயன்படுத்தப்பட்ட தொகைக்கான ரசீதை சென்னை ட்ரெக்கிங் க்ளப் பொறுப்பாளர்கள் மூலமாகப் பெற்று மாத இறுதியில் நிசப்தம் தளத்தில் பதிவு செய்துவிடுகிறேன்.

Trust Opening Balance: Rs.15,76,639.18
Total Donations received: Rs.23,81,252.18 (From 11th Nov to 30th Nov)
Materials Purchased: Rs.4,09,683.00
(Another Rs. 25,000 yet to be debited)
Remaining Amount: Rs. 19,71,569.18 (For Gaja Relief)







முந்தைய பதிவு : இணைப்பு 1
சென்னை ட்ரெக்கிங் க்ளப்:  இணைப்பு 2

1 எதிர் சப்தங்கள்:

Gopalakrishnan P said...

#எழுதினாலும் அலட்சியமே செய்யாமல்..#
-லட்சியமே செய்யாமல் என்றோ அலட்சியப்படுத்தி விட்டு அடுத்த வேலை... என்றோ இருக்கும் என நினைக்கிறேன். வாழ்க வளமுடன்