கொழுப்பும் நலமும் - 2

'கொழுப்பும் நலமும்' கட்டுரைக்கு நிறையப் பேர் பதில் சொல்லியிருந்தார்கள். இத்தகைய உரையாடல் நிகழுமெனில் அது மகிழ்வானது. தொடர்ந்து பேசலாம். இருதயத்தின் கோளாறுகளுக்கு கொழுப்பு காரணமில்லை. இரத்த நாளங்களில் உண்டாகும் புண்கள்தான் அடைப்பை உருவாக்குவதற்கான முக்கியக் காரணி என்கிறார்கள். புண் ஏற்படாமல் பார்த்துக் கொண்டால் இருதய பிரச்சினைகளை குறைத்துவிடலாம் என்பது பேலியோ உணவுமுறைக்காரர்களின் வாதம். 

மருத்துவர் நளினி: 

இரத்தநாளங்களின் உட்புறம் வரும் புண்ணாகும் தன்மை கொழுப்பு அதில் படர காரணம் என்று சொல்கிறார்கள். கொழுப்பு அதிகம் இருப்பதால் மட்டுமே இதய நோய்கள் வருவதில்லை என்பதே தற்போதைய அறிவியல் அறிவித்துள்ளது. பேலியோவில் கொழுப்பு எடுத்துக் கொள்ளலாம் என்றாலும் உங்கள் உடல் எடைக்கேற்ற கலோரியில் மட்டுமே. கொழுப்பு நல்லது என்பதை விட மாவுப்பொருள்(கார்போஹைட்ரேட்) கெட்டது என்பது சரியான வாசகமாக இருக்கும்.

பேலியோவை தமிழகத்தில் காலூன்றச் செய்ததில் முக்கியமானவரான நியாண்டர் செல்வன்: 

கொழுப்பு முதலில் நம் சிறுகுடல், பெருகுடலுக்கு சென்று அதன்பின் கால் பிளேடாரில் ஜீரணம் ஆகிறது. உணவில் இருக்கும் கொழுப்பு நேரடியாக இதயத்தில் சென்று அடைப்பதில்லை...அது நிகழ்ந்தால் மெடிக்கல் மிராகிள். உணவில் இருக்கும் மாவுசத்து, கொழுப்பு எல்லாவற்றையும் எல்.டி.எல் ஆக ஈரல் மாற்றி ரத்தநாளங்களில் அனுப்புகிறது அதுதான் இதயத்தில் சென்று அடைக்கிறது...அதாவது ரத்தகுழாய்களில் இருக்கும் உள்காயங்களை சரிசெய்யும் மருந்தாக. ஆக, நீங்கள் முழுக்க கொழுப்பே இல்லாத உணவாக உன்டாலும், இதய நாளங்களில் இன்ஃப்ளமேசன் இருந்தால் அதன்மேல் கொழுப்பை உண்டாக்கி இதயம் அடைக்கவே செய்யும். அதனால் உணவில் இருக்கும் கொழுப்பின் மேல் எந்த பிழையும் இல்லை. உள்காயம் மேல் தான் பிரச்சனை. உள்காயம் உண்டாக்கும் உணவுகள் - மாவுச்சத்து, சர்க்கரை, ஆக்சிடைஸ் ஆன கொழுப்புகள் (ரிபைன்டு ஆயில்கள்) ஆகியவையே.

எது புண்ணை உருவாக்குகிறது என்று கேட்டால் கார்போஹைட்ரேட்டை நோக்கி கை நீட்டுகிறார்கள். 

விதைகள், பருப்பு வகைகளில் கார்போஹைட்ரேட் அதிகமாக இருக்கிறது. உணவில் இருக்கும் சர்க்கரை, கார்போ ஹைட்ரேட்டில் இருக்கும் குளுக்கோஸ், ஒமேகா 6 என்னும் கொழுப்புத்தன்மையுடைய அமிலம் ஆகியன ரத்த நாளங்களில் இருக்கும் செல்களை சிதைக்கின்றன. இதுதான் நியாண்டர் செல்வன் குறிப்பிடும் 'இன்பிளமேஷன்'. 

கார்போஹைட்ரேட்டை அதிகமாக உட்கொள்ளும் போது நம்முடைய இன்சுலின் அளவு அதிகமாக சுரக்கிறது. இந்த இன்சுலின் பசியைத் தூண்டுகிறது.அது நம்மை மேலும் அதிகமாக உண்ண வைக்கிறது. நாம் மீண்டும் கார்போஹைட்ரேட்டையே எடுத்துக் கொள்கிறோம். இது உடல் எடையைக் கூட்டுகிறது. கூடுதல் எடையும் 'இன்பிளமேஷன்' உருவாக முக்கியக் காரணம்.

ரத்தநாளங்களை பாதிப்பதில் சர்க்கரை நோய் இன்னொரு முக்கியமான காரணமாகிறது. 

ரத்த நாளங்களில் உண்டாகும் புண்ணை சரி செய்ய கொழுப்பு தேவைப்படுகிறது. அதனால் உடல் அதிகமாக கொழுப்பைச் சுரக்கிறது. இப்படித்தான் கார்போஹைட்ரேட் உணவை உண்ணுவதன் வழியாக உடலில் கொழுப்பின் அளவை அதிகரிக்கிறோம் என்று கார்போஹைட்ரேட்டை மண்டை அடியாக அடிக்கிறார்கள்.

சுருக்கமாகச் சொன்னால், கார்போஹைட்ரேட்டையும் சர்க்கரை குளுகோசையும் குறைத்தால் இருதய அடைப்பிலிருந்து தப்பிவிடலாம். பேலியோவில் கார்போஹைட்ரேட் இல்லாத உணவாக பரிந்துரை செய்கிறார்கள். 

ஏற்கனவே பேலியோ பற்றித் தெரிந்திருந்தவர்களுக்கு இவை குறித்து புரிதல் இருக்கக் கூடும். என்னைப் போன்றவர்கள் இன்னமும் சற்று விரிவாகத் தேட வேண்டியிருக்கும். தேடுகிறேன்.