அரசியல் மேடை

மிகக் கலவையான பெயர்களைக் கொண்ட அழைப்பிதழ் இது. யாரிடம் காட்டினாலும் 'இது என்ன காம்போ' என்பார்கள். 

கடந்த வாரத்தில் ஒரு நாள்  தா.பாண்டியன் எழுதிய  'மதமா? அரசியலா?' புத்தகத்தைக் கொடுத்து வாசிக்கச் சொன்னார்கள். ஐம்பது பக்கம்தான். புத்தகத்தின் பேசுபொருள் மிக முக்கியமானது. இரண்டு மணி நேரங்களில் வாசித்து முடித்துவிட்டேன். 

'வெளியீட்டு விழா நடைபெறவிருக்கிறது. வாழ்த்துரையில் பெயரை சேர்த்துக் கொள்ளலாமா' என்று கேட்ட போது சரி என்று சொல்லிவிட்டேன். ஒற்றைப்படையான கொள்கைகள் கொண்ட பங்கேற்பாளர்களாக இருந்திருந்தால் மறுத்திருப்பேன்.

வாழ்த்துரை என்பதால் புத்தகத்தைப் பற்றி அதிகம் பேச வேண்டியதில்லை.  பொதுவாக பேசலாம்.  'பத்து அல்லது பதினைந்து நிமிடங்கள் பேசுங்கள்' என்று சொல்லியிருக்கிறார்கள். கூட்டத்தில் முதல் பேச்சே என்னுடையதுதான் என்பதால் கூடுதலாக ஐந்து பத்து நிமிடங்களை எடுத்துக் கொண்டாலும் கூட எதுவும் சொல்ல மாட்டார்கள் என்று நினைக்கிறேன். 

இது ஒரு வகையில் அரசியல் கூட்டம்தான். 

நான் கம்யூனிஸ்ட் இல்லை. கழகங்களில் இணைந்தவனுமில்லை. தேசியக் கட்சிகளில் உறுப்பினருமில்லை. முழுமையான பெரியரியவாதியுமில்லை, தமிழ்த்தேசியவாதியுமில்லை.  ஆனால் ஒன்றில் உறுதியாக இருக்கிறேன்- எப்பொழுது தேர்தல் நடந்தாலும்  இன்றைய அரசாங்கங்களை எதிர்த்து கடுமையான பரப்புரையைச் செய்ய வேண்டும். எங்கள் தொகுதியில் ஒவ்வொரு பகுதிக்கும் செல்ல வேண்டும். பதவி என்பதை வெற்று அலங்கரமாக்கிக் கொண்டு ஆட்சியாளர்கள் நிகழ்த்திக் கொண்டிருக்கிற கூத்துக்களையும், மக்களுக்கு எதிரான அவர்களது நிலைப்பாடுகளையும் முன் வைத்து மக்களிடம் பேச வேண்டும். எந்த அமைப்பிலும் இயக்கத்திலும் இணைத்துக் கொள்ளாமல் உதிரியாகவே இதைச் செய்ய முடியும்.

எளிய மனிதர்கள் புரிந்து கொள்ளும் அரசியல்தான் மாற்றங்களின் முதல்படி. மக்கள் புரிந்து கொள்ளட்டும். பணத்துக்கு முன்பாக என்ன வேண்டுமானாலும் நடக்கலாம். ஆனால் எதிரிகளுக்கு கடும் தலைவலியைக் கொடுத்துவிட வேண்டும். அப்படியான பரப்புரையைத் தொடங்குவதற்கான முதல் மேடையாக  இந்த புத்தக வெளியீட்டு விழா இருக்கும். அப்படிதான் தயாரிப்புகளை செய்து கொண்டிருக்கிறேன்.