Jul 18, 2016

சசியும் சரவணனும்

சசிக்குமார் ஐபிஎஸ்ஸூடன் அதிகம் பழகியதில்லை. ஒன்றிரண்டு முறை பேசியிருக்கிறோம். சென்னை கடலூரில் வெள்ளம் நிகழ்ந்த சமயத்தில் அழைத்திருந்தார். கடலூருக்கு நிவாரணப் பொருட்களை எடுத்துச் செல்லும் போது தன்னால் உதவ முடிந்தால் நிச்சயமாக உதவுவதாகச் சொன்னார். அப்பொழுது அவர் ஆந்திராவில் இருந்தார். தமிழக அதிகாரிகளே தொடர்பில் இருந்ததால் அவருடைய உதவி தேவைப்படவில்லை. அதன் பிறகு ஒரு முறை அழைத்துப் பேசியிருக்கிறார். பொதுவான உரையாடல் அது. என்னைக் காட்டிலும் இளையவர் என்பதால் அண்ணா என்றுதான் பேசினார். இப்பொழுது சசி இல்லை. இறந்துவிட்டார் அல்லது கொன்றுவிட்டார்கள்.

ஜூலை முதல் வாரத்தில் வேறொரு காரியம் காரணமாக சத்தியமங்கலத்தைத் தாண்டிச் செல்ல வேண்டியிருந்தது. சசிக்குமார் சத்தியமங்கலத்துக்காரர்தான். ரங்கசமுத்திரத்தில் வீடு. சசி இறந்து பதினைந்து நாட்கள் ஆகியிருந்தன. வீட்டிற்கு வெளியில் கண்ணீர் அஞ்சலி பதாகை ஒன்றை வைத்திருந்தார்கள். பைக்கை நிறுத்திவிட்டு வீட்டுக்குள் செல்லலாமா என்று குழப்பமாக இருந்தது. அங்கு யாரையும் தெரியாது. உள்ளே சென்ற போது ஒரு சில உறவினர்கள் இருந்தார்கள். அம்மாவும் அப்பாவும் உடைந்திருந்தார்கள். உறவினர்களிடம் மட்டும் பேச்சுக் கொடுத்தேன். 

துப்பாக்கியை சுத்தம் செய்யும் போது வெடித்ததாக முதலில் செய்தி வெளியானது. அதன் பிறகு தற்கொலை செய்து கொண்டதாகவும் அவரது அருகிலேயே ஒரு தற்கொலைக் குறிப்பு கிடந்ததாகவும் செய்தி வெளியானது. Professional Failure தான் காரணம் என்று கூட இரு குறிப்பை வாசித்தேன். சசியின் உறவினர்கள் எதையுமே நம்புவதாக இல்லை. ‘அவன் தைரியமான ஆளுன்னு எங்களுக்குத் தெரியும்’ என்றார்கள். அவர் பணியாற்றிய பகுதியில் ஏதோ தகராறு நிகழ்ந்திருக்கிறது. கஞ்சா புழக்கத்தைத் தடுத்தார். சட்டவிரோத செயல்களுக்கு எதிராக முரட்டுத்தனமாக நடவடிக்கை எடுத்தார் என்றெல்லாம் செய்திகள் வந்தபடியே இருந்திருக்கின்றன. சற்று பொறுமையாக இருக்கச் சொல்லி வீட்டிலிருந்து அறிவுறுத்தியிருக்கிறார்கள். இதெல்லாம்தான் காரணம் என்கிறார்கள். அதனால்தான் திட்டமிட்டுக் கொன்று நீதியைப் புதைத்துவிட்டார்கள் என்றார்கள். 

ஒரு வேலை இது கொலையாக இருந்திருந்தால் சசியின் கடைசி நிமிடங்களை நினைத்துப் பார்க்கவே பதறுகிறது. என்னவெல்லாம் பேசி சசியைச் சுட்டிருப்பார்கள்? மனம் கண்டதையெல்லாம் யோசித்தது. அழுது கொண்டிருந்த அவரது உறவினர்களை பார்க்கவே முடியவில்லை. யாரிடமும் சொல்லாமல் வீட்டை விட்டு வெளியேறினேன்.

சசி மறைந்து ஒரு மாதம் ஆகிறது. சாதாரணமான குடும்பத்தில் இருந்து ஐபிஎஸ் எழுதி தேர்வானவர். அவருக்கு திருமணம் நிச்சயிக்கப்பட்டிருந்தது. கனவுகளுடன் புதைக்கப்பட்ட அந்த இளைஞனின் மரணம் குறித்து ஃபாலோ-அப் செய்தி என்று எதையும் தேடி எடுக்க இயலவில்லை. அப்போதைக்கு ‘மர்ம மரணம்’ என்று எழுதியதோடு சரி. விட்டுவிட்டு வேறு வேலைகளைப் பார்க்கிறார்கள். வட இந்திய ஊடகங்களை விட்டுவிடலாம். அவர்களுக்கு டெல்லி மும்பையைத் தாண்டி எங்கு நடப்பதும் செய்தியே இல்லை. ஆனால் தமிழக ஊடகங்களாவது இது குறித்து விரிவாக எழுதியிருக்க வேண்டாமா?

அதே போலத்தான் சரவணன். திருப்பூரில் பனியன் தொழிலாளியின் மகன். மதுரையில் எம்.பி.பி.எஸ் முடித்துவிட்டு அகில இந்திய நுழைவுத் தேர்வில் நல்ல மதிப்பெண்களுடன் எய்ம்ஸ் மருத்துவமனையில் எம்.டி சேர்ந்திருக்கிறார். கல்லூரியில் சேர்ந்து பதினைந்து நாட்கள் கூட ஆகவில்லை. விஷ ஊசி செலுத்தி தற்கொலை செய்து கொண்டுவிட்டதாகச் செய்திகள் வருகின்றன. மருத்துவ நண்பர்களிடம் பேசினால் ‘வலது கைப் பழக்கம் இருக்கிற ஒருத்தன் எப்படி வலது கை நரம்பிலேயே ஊசி செலுத்திக் கொள்ள முடியும்?’ என்கிறார்கள். சரவணனின் வலது கையில் விஷ ஊசி செலுத்தப்பட்டிருக்கிறது. என்னவோ காரணம் இருக்கட்டும். நிச்சயமாகத் தற்கொலையாக இருக்க முடியாது என்கிறார்கள். திக்கென்றிருக்கிறது.

ஒரு எளிய மனிதன் மருத்துவம் முடித்து கடும் போட்டி நிறைந்த அகில இந்திய நுழைவுத் தேர்வை அடித்து நொறுக்கி மிகச் சிறந்த கல்லூரியில் முதுநிலைப் படிப்பில் சேர்ந்து பதினைந்து நாட்களுக்குள்ளாக டெல்லியிலிருந்து மூட்டை கட்டி உடலை அனுப்பியிருக்கிறார்கள். அடுத்த ஒன்றிரண்டு நாட்களுக்கு இந்த மரணம் குறித்தான செய்திகள் வெளி வரக் கூடும். அதோடு விட்டுவிடுவார்கள்.

இப்பொழுது மரணம் என்பதெல்லாம் பெரிய பொருட்டே கிடையாது. யாரை வேண்டுமானாலும் மிக எளிதாகக் கொன்றுவிடுகிறார்கள். அதன் பிறகு அது குறித்து எந்தச் சப்தமும் எழாமல் பார்த்துக் கொள்கிறார்கள். சசிக்குமார், சரவணன் மாதிரியான இளைஞர்களின் மரணங்கள் ஆயிரக்கணக்கான கேள்விகளை எழுப்புகின்றன. தமிழக அரசும், ஊடகங்களும் நினைத்தால் இத்தகைய மரணங்கள் குறித்து மிகப்பெரிய சலனத்தை உருவாக்க முடியும். ஆனால் ஏன் செய்வதில்லை என்றுதான் புரிவதேயில்லை.

வட இந்திய ஊடகங்களுக்கு எப்படி டெல்லியில் நடப்பது மட்டும்தான் செய்தியோ அப்படித்தான் பெரும்பாலான தமிழக ஊடகங்களுக்கு சென்னையில் நடப்பவை மட்டும்தான் செய்தி போலிருக்கிறது. சென்னையின் ஒன்றுக்குமே ஆகாத செய்திகளைக் கூட ஊதி ஊதி பெருக்குகிறவர்கள் சென்னையைத் தாண்டி நிகழும் பெரும்பாலான நிகழ்வுகள் குறித்து விரிவாக அலசுவதேயில்லை. குற்றம் சாட்டுவதாக எடுத்துக் கொள்ள வேண்டியதில்லை. சசி ஏன் இறந்தார்? சரவணன் ஏன் கொல்லப்பட்டார் என்பதை கொஞ்சம் மெனக்கெட்டால் விரிவாக அலசி ஆராய்ந்து ஊடகங்களால் எழுத முடியாதா? அவர்களிடம் அதற்கான வலையமைவு இருக்கிறது. பிறகு ஏன் எழுதுவதில்லை? எது தடுக்கிறது? திரைச் செய்திகளுக்கும் அரசியல் செய்திகளுக்கும் தரப்படுகிற முக்கியத்துவத்தை எந்தவிதத்திலும் குறையாகச் சொல்லவில்லை. விற்பனை அவசியம்தான். ஆனால் ஆயிரக்கணக்கான கனவுகளுடனும் லட்சியங்களுடனும் மேலே வருகிற அப்பாவி இளைஞர்களின் கனவுகளுக்கு ஏன் முற்றுப்புள்ளி வைக்கப்படுகிறது என்பதை சற்றேனும் கவனப்படுத்தலாம் அல்லவா? தற்கொலையாகவே இருக்கட்டும். ஏன் தற்கொலை செய்து கொண்டார்கள்? என்ன பிரச்சினைகள் என்பதை விவாதிக்கலாம். அடுத்தடுத்து வரக் கூடிய இளைஞர்களுக்கு தீர்வாக அலசல்களும் விவாதங்களும் அமையட்டும்.

சசிக்குமார், சரவணன் போன்றவர்கள் எதிர்காலத் தமிழகத்தின் அறிவார்ந்த அடையாளங்களாகத் திகழ்ந்திருக்கக் கூடும். சப்தமேயில்லாமல் முடித்தாகிவிட்டது. இனியாவது கொஞ்சம் சப்தம் எழுப்பிப் பார்க்கலாம். ஊடகங்கள்தான் மனம் வைக்க வேண்டும்.

9 எதிர் சப்தங்கள்:

சேக்காளி said...

//ஊடகங்கள்தான் மனம் வைக்க வேண்டும்//
பணமிருக்கும் விசயங்களில் தான் அவர்கள் மனம் வைப்பார்கள்.வேறு மாதிரி யோசிக்க வேண்டும் மணி.

Dev said...

I can quote Morpheus from Matrix

The Matrix is a system, Neo. That system is our enemy. But when you're inside, you look around, what do you see? Businessmen, teachers, lawyers, carpenters. The very minds of the people we are trying to save. But until we do, these people are still a part of that system and that makes them our enemy. You have to understand, most of these people are not ready to be unplugged. And many of them are so inured, so hopelessly dependent on the system, that they will fight to protect it.

I could see that the people in Kodagu fought for MK Ganapathy continuously from the day he had committed suicide. KJ George has to resign as people are turning against the congress govt. here. I have to laugh at Tamil Nadu. So how many of the locals here are encountered by Police for fighting against the oppression.

We have been fighting for PIYUSH MANUSH's release, since I am from Salem.

I can quote Agent Smith again:
" I'd like to share a revelation that I've had during my time here. It came to me when I tried to classify your species and I realized that you're not actually mammals. Every mammal on this planet instinctively develops a natural equilibrium with the surrounding environment but you humans do not. You move to an area and you multiply and multiply until every natural resource is consumed and the only way you can survive is to spread to another area. There is another organism on this planet that follows the same pattern. Do you know what it is? A virus. Human beings are a disease, a cancer of this planet. You're a plague and we are the cure."

Not sure these are so blunt. But unfortunately TRUTH. Media, govt, police and what not are business ventures. kaasu panam thuddu.

Thanks,
Dev

Jaikumar said...

தமிழக அரசியல்விவியாதிகளுக்கு இதிலென்ன லாபம் இருக்கபோகுது. அவனுக்கு விலங்கு வராமல் இருக்க வழிவகைகளைத் தான் அவன் பார்ப்பான். இதுக்கு குரல் கொடுத்தால் அவனுக்கு வேறு வகையில் ஆப்பூ வரும்.

gvs said...

You are absolutely right..but they will not bother. I want you to think what can we do to protect this. It is bcos that they are tamilians they have not been cared much.
How do we collectively bring people together to at least be sensitive to these happenings and teach them to deal with it.

TV VIDEOS said...

ஊடகங்களுக்கு மனசு கெட்டு ரொம்ப நாள் ஆச்சு பிரதர்...!

போத்தி said...

What could we do, Mani?

We can't change the system alone. We can't change the media alone, either.

If anyone has any idea to work together and make an impact together, I am all ears.

Ram said...

டாக்டர் சரவணனின் மரணம் தற்கொலை அல்ல: உடற்கூறு ஆய்வில் தகவல்

http://www.dinamani.com/latest_news/2016/07/19/%E0%AE%9F%E0%AE%BE%E0%AE%95%E0%AF%8D%E0%AE%9F%E0%AE%B0%E0%AF%8D-%E0%AE%9A%E0%AE%B0%E0%AE%B5%E0%AE%A3%E0%AE%A9%E0%AE%BF%E0%AE%A9%E0%AF%8D-%E0%AE%AE%E0%AE%B0%E0%AE%A3%E0%AE%AE%E0%AF%8D-%E0%AE%A4%E0%AE%B1%E0%AF%8D%E0%AE%95/article3536721.ece

Jones Kiln said...

சக மருத்துவரை கொலை சொய்து அவருடைய மருத்துவ இடத்தை பயன்படுத்தி மருத்துவராக வெளிவரும் அவன் என்னவெல்லாம் இந்த
சமுகத்துக்கு செய்வானோ பயமாக இருக்கிறது..

Nat Chander said...

ji
we have to be extremely carefuleverywhere...
years back when i had occupied a c hair in the crowded central station in chennai.
soon i found that two young ladies had occupied my right side.left side chairs and began to converse..
i smelt some doubts over their behaviour and immediately vacated the place....
aftyer six months the central station chennai police
had arrested the same two ladies for some offences...