Jun 15, 2015

அடுத்தது

வ.வே.சு ஐயர் எழுதிய ‘குளத்தங்கரை அரசமரம்’ என்ற கதைதான் தமிழில் எழுதப்பட்ட முதல் சிறுகதை என்கிறார்கள். அதற்கு முன்பாகவே நிறைய கதைகள் எழுதப்பட்டிருந்தாலும் 1908 ஆம் ஆண்டு தொடங்கப்பட்ட விவேகபோதினி என்ற பத்திரிக்கையில் வெளிவந்த இந்தக் கதையைத்தான் முதல் சிறுகதையாகக் குறிப்பிடுகிறார்கள். ஆனால் இந்தக் கதையே கூட தழுவல்தான் என்று மாலன் ஒரு கட்டுரையில் குறிப்பிட்டிருந்தார். அப்படியென்றால் ‘இதுதான் தமிழில் எழுதப்பட்ட முதல் சிறுகதை’ என்று துல்லியமாக யாராவது சுட்டிக் காட்டியிருக்கிறார்களா என்று தெரியவில்லை.

முதல் சிறுகதை பற்றித் தெரியாவிட்டால் பிரச்சினையில்லை- முதல் சிறுகதையிலிருந்துதான் தொடங்க வேண்டும் என்றில்லை- தமிழில் எழுதப்பட்டிருக்கும் ஆயிரக்கணக்கான சிறுகதைகளிலிருந்து முக்கியமான சிறுகதை எதையும் தவற விடக் கூடாது என்கிற எண்ணத்தில்தான் எஸ்.ராமகிருஷ்ணன் தேர்ந்தெடுத்த நூறு சிறுகதைகளை வாசிக்கும் பணியைத் தொடங்கினோம். பெங்களூரில் ஒவ்வொரு மாதமும் நடக்கும் இரண்டாம் ஞாயிறு கூட்டம் அதற்கான மிகச் சிறந்த களமாக இருக்கிறது. ஒவ்வொரு கூட்டத்துக்கும் எப்படியும் சற்றேறக்குறைய இருபது பேர்களாவது வந்துவிடுகிறார்கள். நேற்று (14-ஜூன்-2015) நடந்த கூட்டமும் அப்படித்தான் இருந்தது.

கி.ரா மற்றும் கு.அழகிரிசாமியின் தலா மூன்று கதைகள் விவாதிக்கப்பட்டன. இந்த வாசிப்பின் விளைவாக அழகிரிசாமியின் மொத்த எழுத்துக்களையும் வாசித்துவிட்டு ஒரு விவாதத்தை நடத்தலாம் என்கிற முடிவுக்கு வந்திருக்கிறோம். அழகிரிசாமி அவ்வளவு முக்கியமான எழுத்தாளராகத் தெரிகிறார். அதே போல தொகுப்பிலிருந்து இதுவரையிலும் இருபது சொச்சம் கதைகள் வாசிக்கப்பட்டு விவாதிக்கப்பட்டிருக்கின்றன. ஐம்பது கதைகள் வாசிக்கப்பட்டவுடன் ஒரு சிறுகதை அரங்கு நடத்தலாம் என்கிற ஆசையும் துளிர்த்திருக்கிறது. பாவண்ணன் உள்ளிட்ட பெங்களூர் வாழ் எழுத்தாளர்கள் தவிர வெளியூரிலிருந்து சிறப்பு அழைப்பாளர்களையும் அழைத்து ஒரு அரங்கம் நடத்த வேண்டும். 

வாசிக்கத் தொடங்குபவர்களுக்கு எழுத்தின் பிற எந்த வடிவத்தை விடவும் சிறுகதைதான் மிகச் சிறந்த வாசல்.  ‘இதுவரைக்கும் நான் எதுவுமே வாசித்ததில்லை’ என்று சொல்பவனை எழுத்து வாசிப்பு போன்றவற்றிலிருந்து துரத்தியடிக்க வேண்டுமானால் அவனது கைகளில் கவிதைத் தொகுப்பைக் கொடுத்துவிட வேண்டும். அதே வாசகனை உள்ளே இழுத்து போட வேண்டுமானால் சிறுகதைகளைக் கொடுத்து வாசிக்கச் சொல்ல வேண்டும். இதைச் சொல்வதற்கு தயக்கம் எதுவுமில்லை. கவிதை புரியவில்லை, நாவல் வாசிக்க நிறைய நேரம் பிடிக்கிறது, கட்டுரையாளன் தன்னுடைய கருத்துக்களை என் மீது திணிக்கிறான் போன்ற பொதுமைப் படுத்தப்பட்ட குற்றச்சாட்டுக்கள் இல்லாத எழுத்து வடிவம் சிறுகதை. 

எஸ்.ரா தேர்ந்தெடுத்த சிறுகதைகளைக் கொண்ட இந்தத் தொகுப்பை முழுமையாக வாசித்து முடிக்கும் போது தமிழில் சிறுகதைகளின் போக்கு பற்றிய ஒரு நீள்வெட்டான பார்வை கிடைத்துவிடும் என்கிற நம்பிக்கையிருக்கிறது. வெளியூர் வாசகர்களில் சிலரும் தொடர்ந்து இந்தச் சிறுகதைகளை வாசித்துக் கொண்டிருக்கிறார்கள். அத்தனை பேரும் விவாதத்தில் பங்கெடுக்க வேண்டும் என்கிற அவசியம் எதுவும் இல்லை. வாய்ப்பு கிடைக்கும் போது வாசித்து வைத்தால் போதும். வாரம் ஒன்று அல்லது இரண்டு சிறுகதைகளை வாசித்தால் கூட போதும். வெகு விரைவாகவே பெரும்பாலான கதைகளையும் வாசித்து முடித்துவிடலாம். 

அடுத்த மாதத்தில் லா.ச.ரா, சுந்தர ராமசாமி மற்றும் நகுலனின் சிறுகதைகள் வாசிக்கப்படவிருக்கின்றன. மொத்தம் ஆறு சிறுகதைகள். வாசித்துவிடுங்கள். வாரம் ஒன்றிரண்டு கதைகளைப் பற்றி இங்கு விவாதிக்கலாம். 

நகுலன்

சுந்தர ராமசாமி

லா.ச.ராமாமிருதம்
6. பச்சை கனவு

இன்றைய மற்றொரு பதிவு : வேலை

4 எதிர் சப்தங்கள்:

Muralidharan said...

Any one can participate on this forum? or I need to register and I should read all the story before coming there ?

Just a question, I am also from Bangalore like to participate but unfortunately, I"m not able to complete all the story which you published last week.

Anonymous said...

Any online book store selling this book??

இளைய நிலா said...

ஒரு ராத்தல் இறைச்சி -அருமையான சிருகதை... ரெம்ப நாள்களித்து வாசித்த நல்ல கதை...

c vijayakumar said...

I am 66 now.Even now I remember the short story 'Paar kadal'by La Sa Ra. It is a wonderful story which I used to read now and then even now. Similarly I was totally engrossed by the following stories:'Anbalippu' by Ku Azhagirisami, 'Mul Greedam' by Thi Janakiraman and 'Vidiyuma' by Ku Pa Ra.
Regarding the first Tamil short story, Si Su Chellappa is of the view Maha Kavi Bharathiar's 'aril oru panghu' is to be treated as the first Tamil short story. (Ref: 'Tamizhi Sirukathai Pirakirathu' by Si Su Chellappa, peacock publication pp 23 - 42.