May 10, 2013

இந்த கட்-ஆஃப்புக்கு எந்தக் கல்லூரியில் இடம் கிடைக்கும்?


+2 முடித்த பிறகு இன்ஜினியரிங்தான் சேர வேண்டும் என ஒற்றைக் காலில் நிற்பவர்களுக்கு பெருங்குழப்பம் இருக்கும். அதிலும் கிராமப்புற மாணவர்கள் இருக்கிறார்கள் பாருங்கள். கண்ணைக் கட்டி கருங்காட்டில் விட்டது போல திணறிக் கொண்டிருப்பார்கள்.

எந்தக் கல்லூரியைத் தேர்ந்தெடுப்பது? எந்த பாடம்? அந்தக் கல்லூரியில் படித்தால் கேம்பஸ் இண்டர்வியூ இருக்குமா? இந்த பாடத்தை தேர்ந்தெடுத்தால் வேலை வாய்ப்பு அமோகமாக இருக்குமா என்றெல்லாம் ஆயிரத்தெட்டு கேள்விகள் இருக்கக் கூடும்.  இந்த சந்தேகம் எல்லாம் தவறே இல்லை. கண்டவர்கள் சொல்வதைக் கேட்டுக் கொண்டு போய் குழியில் விழுந்துவிடாமல்  நமக்கு தோன்றும் அத்தனை கேள்விகளுக்கும் பதில் கண்டுபிடித்து தெளிவான முடிவை எடுக்கலாம்.

நேற்று +2 மாணவர்களும் அவர்களது பெற்றோர்களும் குழம்பியதை பார்க்கும் போது கவுன்சிலிங் வரைக்கும் குட்டி குட்டியாக சில கட்டுரைகளை தனிப்பட்ட அனுபவத்திலிருந்து எழுதலாம் என்று தோன்றியது- கட் ஆஃப், கவுன்சிலிங், பாடங்கள், கல்லூரிகள் என இயன்றவரைக்கும் ஒரு ரவுண்ட் அடிக்கலாம். யாராவது ஒரு சிலருக்கேனும் பயன்படும் என நினைக்கிறேன்.

அநேகமாக அத்தனை ப்ளஸ் டூ வாலாக்களும் இந்நேரம் கட்-ஆஃப் மதிப்பெண்ணை கணக்கிட்டிருப்பார்கள். இருந்தாலும் அதில் இருந்தே தொடங்கிவிடலாம். இது சிம்பிளான கணக்கீடுதான். கணிதத்தில் வாங்கிய மதிப்பெண்ணை இரண்டால் வகுத்துக் கொள்ள வேண்டும். இயற்பியல் மற்றும் வேதியியல் பாட மதிப்பெண் ஒவ்வொன்றையும் நான்கால் வகுத்துக் கொள்ள வேண்டும். இந்த மூன்றையும் கூட்டினால் கிடைக்கும் மதிப்பெண்கள்தான் கட்-ஆஃப்.

உதாரணமாக ஒரு மாணவர் கணக்கு பாடத்தில் 182, இயற்பியலில் 195 மற்றும் வேதியியல் 187 மதிப்பெண்கள் வாங்கியிருக்கிறார் என்று வைத்துக் கொள்வோம்.

கணக்கு        -  182/2    = 91
இயற்பியல் -  195/4    = 48.75
வேதியியல் -  187/4   = 46.75

கட்-ஆஃப் = 91+48.75+46.75 = 186.5/200

இதை வைத்துக் கொண்டு எந்தக் கல்லூரியில் இடம் கிடைக்கும்? சென்ற வருடத்தில் இந்த கட்-ஆஃப் மதிப்பெண்ணுக்கு எந்தெந்தக் கல்லூரிகளில் ஸீட் கிடைத்திருக்கிறது என்பதை கொஞ்சம் ஆராய்ந்தால் இந்த ஆண்டும் அதே கல்லூரியில் அட்மிஷன் வாங்கிவிட முடியுமா என்பதை குத்து மதிப்பாக கணக்கிட்டு விட முடியும். இருந்தாலும் இது அத்தனை துல்லியமான கணிப்பாக இருக்க வாய்ப்பில்லை.

உதாரணமாக சென்ற ஆண்டு வினாத்தாள் எளிமையாக இருந்திருந்தால் 186.5யை விட நல்ல கட் ஆஃப் உடைய மாணவர்கள் நிறைய பேர் இருந்திருப்பார்கள். எனவே இதை சுமாரான கட்-ஆஃப் ஆகத்தான் கருத முடியும். அதுவே இந்த ஆண்டு வினாத்தாள் கடினமாக இருந்திருந்தால் 186.5 என்பதையே நல்ல கட்-ஆஃப்பாகத்தான் எடுத்துக் கொள்ள வேண்டும். அப்படியானால் இந்த ஆண்டு கட்-ஆஃப் எப்படிப்பட்டது என்பதை இன்னொரு கணக்கு மூலம் முடிவு செய்யலாம்.

சென்ற ஆண்டு ஒவ்வொரு பாடத்திலும் எத்தனை பேர் இருநூறுக்கு இருநூறு வாங்கியிருக்கிறார்கள் என்றும் இந்த ஆண்டு அதே போல எத்தனை பேர் கலக்கியிருக்கிறார்கள் என்பதை ஒப்பிடுவதுதான் லாஜிக். சென்ற ஆண்டு கணிதப் பாடத்தில் 2656 பேர் 200க்கு 200 வாங்கியிருக்கிறார்கள். இந்த ஆண்டு அந்த எண்ணிக்கை 2,352 ஆக குறைந்திருக்கிறது. சென்ற ஆண்டு இயற்பியலில் 142 பேர் அதுவே இந்த ஆண்டு 36 பேர்தான். வேதியியலில் கடந்த ஆண்டு 1444 பேர் அதுவே இந்த ஆண்டு 1499. இயற்பியலும் கணிதமும் கடந்த ஆண்டை விட சற்று கடினமாக இருந்திருக்கும் போலிருக்கிறது. வேதியியல் சற்று எளிமையாக இருந்திருக்கக் கூடும். இப்பொழுது அது பிரச்சினையில்லை. விசாரித்த வரையில் சென்ற வருடமும் இந்த வருடமும் கட்-ஆஃப் மதிப்பெண்களில் பெரிய வித்தியாசம் இருக்காது போலிருக்கிறது. அப்படியே இருந்தாலும் ஒன்று அல்லது ஒன்றரை மதிப்பெண் வரைக்கும் கூட்டிக் கொள்ளலாம் என்று தோன்றுகிறது. அதாவது இந்த ஆண்டு 186.5 மதிப்பெண் வாங்கியிருந்தால் கடந்த ஆண்டு 188 மதிப்பெண்ணுக்கு ஸீட் கிடைத்த கல்லூரிகளில் இடம் பிடித்துவிடலாம். 

சென்ற ஆண்டிற்கான கட்-ஆஃப் விவரங்களை அண்ணா பல்கலைக்கழகம் வெளியிட்டிருக்கிறது. பின்வரும் லின்க்கின் வாலைப் பிடித்துச் சென்று  அதில் மாவட்டம், கல்லூரி, சாதிப்பிரிவு ஆகியவற்றைத் தேர்ந்தெடுத்து பார்த்தால் கடந்த ஆண்டில் இந்த மதிப்பெண்ணுக்கு எந்தக் கல்லூரியில் இடம் இருந்தது என்பதைத் தெரிந்து கொள்ளலாம். இந்த ஆண்டும் கிட்டத்தட்ட அதே கல்லூரிகளில் இடம் இருப்பதற்கு வாய்ப்புகள் இருக்கின்றன.


கீழே இருக்கும் இந்தப் படம் 2011 ஆம் ஆண்டுக்கான பட்டியல்-

அந்த வருடத்தில் கோவை பி.எஸ்.ஜி கல்லூரியில் எலெக்ட்ரானிக்ஸ் அண்ட் கம்யூனிகேஷன் பிரிவில் சேர்வதற்கு பிற்படுத்தப்பட்ட வகுப்பினராக இருந்தால் 199.25 மதிப்பெண்கள் தேவைப்பட்டிருக்கிறது. கோவை குமரகுரு கல்லூரியில் சேர்வதற்கு எஸ்.சி பிரிவினருக்கு 184.25 மதிப்பெண்கள் தேவைப்பட்டிருக்கிறது.



இப்படியான Comparision மூலமாக கடந்த ஆண்டுகளில் நமது கட்-ஆஃப் மதிப்பெண்ணுக்கு கிடைத்த கல்லூரிகளை அடையாளம் கண்டுவிட்டால் அவற்றை அடிப்படையாக வைத்து ஒரு பட்டியலைத் தயாரித்துக் கொள்ளலாம். இந்தப் பட்டியல் கவுன்சிலிங் போகும் போது நிச்சயம் தேவைப்படும். அது பற்றி பேசலாம்....