Dec 21, 2012

நீங்க ஒரு வில்லேஜ் விஞ்ஞானி பாஸ்!


“நீங்க ஒரு வில்லேஜ் விஞ்ஞானி பாஸ்” - அடுத்தவர்களை நக்கலடிப்பதற்கு மட்டுமே இந்த வரியைப் பயன்படுத்துவதால் உண்மையான வில்லேஜ் விஞ்ஞானியை பாராட்டும் போது எப்படி பாராட்டுவது என்று குழப்பம் வந்துவிடுகிறது. 

பாலாஜி அப்படியான ஒரு வில்லேஜ் விஞ்ஞானி. இருபத்தி மூன்று வயதுதான் ஆகிறது. கல்லூரியில் எம்.டெக் படித்துக் கொண்டிருக்கிறார். ஃபேஸ்புக்கில் தொலைபேசி எண்ணைக் கேட்டபோது கொடுத்திருந்தேன். ஒரு மாலை நேரத்தில் “சார், விழுப்புரம் மாவட்டம் கண்டராச்சிபுரத்திலிருந்து பேசுகிறேன்” என்று அவர் அலைபேசியில் சொன்னபோது அசால்ட்டாகத்தான் எடுத்துக் கொண்டேன். 

“நிறைய ரோபோ செஞ்சிருக்கேன் சார்” என்று ஆரம்பித்தவர் குட்டி குட்டி ரோபோவில் தொடங்கி ஆளுயர ரோபோ வரைக்கும் தான் விதவிதமாக வடிவமைத்தது குறித்து கில்லி விளையாடினார். அத்தனையும் Made by பாலாஜி. ரோபோ ஒன்றும் லேசுப்பட்ட காரியமில்லை. நான்கைந்து பேர் சேர்ந்து ஒரு டீமாக வேலை செய்தாலும் கூட மண்டையை பிய்த்துக் கொள்ள வேண்டியிருக்கும். அப்படியே சிரமப்பட்டாலும் கூட செய்து முடிக்கும் ரோபோ வெற்றியடையும் என்று சொல்ல முடியாது. 

ஆனால் பாலாஜி ரோபோடிக்ஸில் தனி ஆவர்த்தனம் நடத்துகிறார். அதுவுமில்லாமல் இந்த ரோபோக்கள் வெற்றிகரமானவை என்பதுதான் முக்கியமான விஷயம். கேட்பதற்கு பிரமிப்பாக இருந்தது. பேசி முடித்த பிறகு பாலாஜியை ஆரம்பத்தில் அத்தனை அசால்ட்டாக எடுத்துக் கொண்டிருக்க வேண்டியதில்லை எனத் தோன்றியது. 

படத்தில் இருக்கும் ரோபோ பறந்து செல்கிறது. ஆளில்லாத விமானம் போல. காகிதத்தில் ராக்கெட் செய்து பறக்கவிடுவதே எத்தனை சிரமம் என்று செய்து பார்த்தவர்களுக்குத் தெரியும். ஆனால் ஏரோ டயனமிக்ஸை சர்வசாதரணமாக வடிவமைத்திருக்கிறார்.


பாலாஜி தனது பள்ளிப்பருவத்திலேயே ரோபோக்களை செய்ய ஆரம்பித்திருக்கிறார். அறிவியல் கருத்தரங்கங்கள், கண்காட்சிகள் என்று என்னதான் கலக்கினாலும் மேலே படிக்க குடும்பச் சூழல் ஒத்து வரவேண்டுமல்லவா? +2 முடித்த பிறகு பிறகு ஒரு ப்ரேக். தச்சுத்தொழிலாளியான அப்பாவால் பாலாஜியை அவ்வளவு எளிதாக கல்லூரியில் சேர்க்க முடியவில்லை. அடுத்த வருடம் பணம் சேர்த்து இஞ்சினியரிங் சேர்த்து விடுகிறேன் என்று சொல்லியிருக்கிறார். இப்படிக் கிடைத்த ஒரு வருட இடைவெளியிலும் சில ரோபோக்களை செய்து கொண்டிருந்த பாலாஜி அடுத்த வருடத்தில் மயிலம் பொறியியல் கல்லூரியில் சேர்ந்திருக்கிறார்.

கல்லூரிக் காலம் பாலாஜிக்கு இரண்டு சிறகுகளை கூடுதலாக செருகிவிட்டிருக்கிறது. உளவு பார்த்து வரும் ஸ்பை ரோபோ, மினியேச்சர் ஜே.சி.பி என கலர்கலராக படம் காட்டிக் கொண்டிருந்தவரின் படத்தை உள்ளூர் பத்திரிக்கைகள் வெளியிடத் துவங்கின. உற்சாகம் பிளிறிட இன்னமும் ஏகப்பட்ட ரோபோக்களை செய்திருக்கிறார்.


கல்லூரியை முடித்துவிட்டு வேறொரு கல்லூரியில் ஆராய்ச்சியாளராக வேலை செய்து கொண்டிருந்தபோது நாவலர் நெடுஞ்செழியன் கல்லூரி நிர்வாகத்தினர் பாலாஜியின் மேற்படிப்புக்கான அனைத்து செலவுகளையும் ஏற்றுக் கொள்வதாகச் சொல்லி எஸ்.ஆர்.எம் கல்லூரியில் எம்.டெக் ரோபோடிக்ஸ் சேர்த்துவிட்டிருக்கிறார்கள். 

கல்கி வார இதழில் ரோபோடிக்ஸ் குறித்தான தொடரை எழுதிக் கொண்டிருந்தபோது இந்தியாவில் ரோபோடிக் துறையில் முக்கியமான ஆட்களை பற்றிய செய்திகளை இணையத்தில் தேடிப்பார்த்திருக்கிறேன். ஆனால் பாலாஜியின் ஊக்கத்துடன் செயல்படும் ரோபோடிக் ஆர்வலர்களை கண்டுபிடிக்க முடிந்ததில்லை. 



ஆர்ட்டிஃபிஷியல் இண்டலிஜென்ஸ், ஜெனிடிக் அல்காரிதம் போன்ற ரோபோடிக்ஸின் தற்கால நுட்பங்கள் தெரியாமலேயே கலக்கிக் கொண்டிருக்கிறார் பாலாஜி.

மிகச் சாதாரண குடும்பத்தில் பிறந்து சொந்தமாக கையை ஊன்றி கர்ணம் அடித்து ரோபோடிக்ஸில் வெற்றிக் கொடிகட்டும் பாலாஜி  நவீன நுட்பங்களைக் கற்றுக் கொள்வதோடு அவருக்கு வாய்ப்புகள் மட்டும் சரியாக அமைந்து விட்டால் மிக முக்கியமான விஞ்ஞானியாக வலம் வருவார் என்பதில் சந்தேகம் இல்லை. 

“எம்.டெக் முடிச்சுட்டு வேலை தேடப் போறீங்களா?” என்றேன்

“வேலை கிடக்கட்டும் சார். அது அவசியமில்லை. நான் சயிண்டிஸ்டாக போறேன். அதுவும் சக்ஸஸ்ஃபுல்லான சயிண்டிஸ்ட்” என்றார். அதை அதீத நம்பிக்கை என்று ஒதுக்கி விட முடியாது. அவரிடம் திறமையிருக்கிறது. அந்த திறமை மீது அவருக்கு நம்பிக்கையும் இருக்கிறது. 

இத்தகைய இளம் வயது சாதனையாளருக்கு வசதிகள், வாய்ப்புகள் என எதுவுமே இல்லையென்றாலும் கூட ஊக்கம் அத்தனையையும் சாத்தியப்படுத்திவிடும். யாரேனும் ஊடகவியலாளர்கள் இந்தக் குறிப்பை கவனிக்க நேர்ந்தால் கொஞ்சம் பாலாஜியை கவனியுங்கள். பாலாஜியை 8056834037 என்ற எண்ணில் தொடர்பு கொள்ளலாம்.  ஒரு அலைபேசி அழைப்பு அல்லது ஒரு எஸ்.எம்.எஸ் அவருக்கான ஊக்கத்தை தரும் என நம்புகிறேன். 

7 எதிர் சப்தங்கள்:

ஜீவ கரிகாலன் said...

இதை வாசிக்கும் போது எனக்கும் அல்லவா புத்துணர்வு வருகிறது.... ஒரு வாழ்த்துகளை சொல்லி வருகிறேன்

வி.பாலகுமார் said...

வாழ்த்துகள் பாலாஜி !

semmalai akash said...

ஆஹா! அற்புதம் அவரை அழைத்து பாராட்டிட உங்களிடம் போன் நம்பர் கேட்க இருந்தேன். நீங்களே கொடுத்துவிடீர்கள் மிக அருமை, அவருக்கான வாழ்த்தை இங்கும் தெரிவிக்கிறேன். பகிர்வுக்கு நன்றி நண்பரே!

gocricket said...

Excellent Balaji... Proud to be your friend... All the best for your future.. And wishing u to become a great Scientist.. :)

Satheez said...

super da balaji.......continue exploring ur dreams,,,,, we are there for u,,,,,,,,

Deiva said...

Congratulations Balaji! Keep it up! Wish you all the best

Gopalakrishnan P said...

Balaji Vaazhha valamudan

Prof.P.Gopalakrishnan,
Dean S&H,
RVS CET,
COIMBATORE